வார்த்தைகளை உடைத்தெறி
இல்லையேல் அதன் கனம்
என்னைக் கொன்றுவிடும் …

நதிக்கரையோரத்து நாணலைப்போன்று
நான் அச்சமுறுகிறேன் …

அச்சம் கலந்த இரவுகளில்
நான் தூக்கம் கலைந்து துயருறும்
உன் வார்த்தைகளை உடைத்தெறி …

நீ மௌனித்த கணங்களில் மட்டுமே
என் மௌனம் அர்த்தம் கொள்கிறது …

உனக்கும் எனக்குமான உறவுக்கு
உடல் மொழியே போதுமானது …

இயற்கையிடம் நாம் கற்றதெல்லாம்
அங்குலம் அங்குலமாய் பேசுவோம்
விழி மொழியால்
எனவே
வார்த்தைகளை உடைத்தெறி …

உனக்கும் எனக்குமான
தனித் தனி மௌனத்தை தொலைத்து
பொது மௌனத்தில் வாழ்வோம் …

மௌனம் கூட
பேசாத வார்த்தைகளே
எனவே
வார்த்தைகளை உடைத்தெறி …

29-07-2005

இந்த ஆக்கம் பற்றிய உங்கள் கருத்துக்கள்(0 posts)