இன்னும் எத்தனை
புத்தம் புதுத் தளிர்களைப்
போர் நெருப்பினில் போட்டுப்
பொசுக்க வேண்டும்?
 
ஆதி; மனிதன் ஆற்றிய யாகங்களில்
அவன் சொரிந்தவை எவை?
தான் சிறந்ததெனக் கருதியவற்றைத்தான்
ஆகுதியாய் அர்ப்பணித்தானா?
 
ஏற்புடையதொன்றை அடைய வேண்டின்,
அதற்கு ஈடான இன்னொன்றை
இழந்துதான் ஆகவேண்டுமா?
 
என் அயலவன் என்ன செய்தான்?
எதற்காக, என்னுடையதென
நான் எண்ணியிருந்த
நிலத்தினுள் நுழைந்து
என்னைத் துரத்தினான்?
அவனை எதிர்க்கத் திராணியற்று
நான் விலகி ஓடினேன்.
 
எண்ணிப் பார்க்கையில்
காணிச் சண்டையென்பது
மிகமிக இயற்கையானதாகவே
எனக்குத் தோன்றுகின்றது.
 
ஒவ்வொரு விலங்குக்கும்
பட்சிக்கும், பூச்சிக்கும்
அது வசிக்க, வாழ, பெருக
ஓரிடம் நிச்சயம் வேண்டும்.
அதற்காக அது
போரிட்டே ஆகவேண்டும்!
 
வழியில் தடையாய் நிற்கும்
பெரும் நெருப்பைக்கூட
தமது உடலால் அணைத்து அணைக்கும்
ஒருவகை எறும்புகள்
உண்டெனக் கேள்வி.
 
முன்னே நிற்பவைதான்
முதலில் அழிய வேண்டுமா?
 
அடுத்து, அடுத்து, அடுக்கடுக்காய்
தம்முயிரை அர்ப்பணித்துத்தான்
அவை தடையகற்றி பின்வரும்
தமது இனத்துக்குப் பாதை சமைத்து
வாழ்வு தருகின்றன!
 
ஆனால் நானோ
இந்த வரிசையில் இல்லையே!
ஓரமாக ஒதுங்கி
பாதுகாப்பாக நின்றபடி
பாட்டுக்கள் மட்டும் பாடி
உற்சாகப் படுத்துவதில்
உன்னதம் இல்லையே!

இந்த ஆக்கம் பற்றிய உங்கள் கருத்துக்கள்(1 posts)